У мінулы чацвер у Рэчыцы на вул. Маладзёжнай, 3д, адбылося адкрыццё новага магазіна – універсама MART INN. Як адзначыў Гінтарас Марцінкявічус, кіраўнік кампаніі MART INN FOOD, якая з’яўляецца адзінай беларускамоўнай гандлёвай сеткай на Беларусі, гэта шаснаццаты магазін у нашай краіне, трэці ў Гомельскай вобласці і найлепшы сярод усіх магазінаў сеткі з будаўніцкага пункту гледжання. І насамрэч, каля гандёвага аб’екта абсталяваная зручная аўтапаркоўка, усталяваны светлафор, у магазіне – прасторныя залі для пакупнікоў, што дае магчымасць уважліва вывучыць шматлікі разнастайны тавар на паліцах.
Старшыня Рэчыцкага райвыканкама Віталь Панчанка падчас адкрыцця заўважыў, што магазін адкрыўся ў першую чаргу для пакупнікоў, і пажадаў, каб тая якасць тавару, якая ёсць у дзень адкрыцця, захоўвалася заўсёды. А на стэлажах і вітрынах было на што паглядзець. У зоне садавіны-гародніны, напрыклад, – прыгожыя чырвона-жоўтыя манга, велізныя какосы, свежыя трускаўкі (нятанныя, але вельмі апетытныя), чырвоны і зялёны перац чылі, дробныя памідоры чэры, цёмна-зялёныя авакада, звыклы ўжо набор астатніх пладоў (вінаград-бананы-яблыкі, цыбуля-гуркі-морква і г.д.) і нават жывыя лаўровыя дрэўцы для тых, хто любіць усё самае свежае. У кандытарскай зоне – вафлі, цукеркі, печыва, розныя рулеты, кексы і шмат розных смачных вырабаў, вялікая колькасць якіх прадаецца па акцыі. Дарэчы, аб’явы пра акцыі размешчаны на жоўтых цэнніках, што вельмі зручна для пакупнікоў: здалёк бачна, на якія тавары сёння ёсць зніжка. У зоне мясных вырабаў – ахалоджанае мяса і субпрадукты, і гэта стандарт сеткі MART INN, заўважае дырэктар дэпартамента маркетынгу і продажу Алена Сітдзікава, – прадаваць менавіта ахалоджанае, а не замарожанае мяса. А каму патрэбна замарозка – калі ласка, у залі ёсць таксама і лядоўні з ёю. Ёсць у магазіне і зона кветак, у якой галоўнымі з’яўляюцца чароўныя архідэі – самыя танныя ў Беларусі, па словах дырэктара дэпартамента. Але і іншыя кветкі не менш прыгожыя: высакародныя зантэдэскіі, сонечныя герберы, рознакаляровыя каланхоэ і шмат розных раслін для пакояў і вуліцы.
Яшчэ адна адметная рыса сеткі, адзначае Алена Сітдзікава, – гэта сезонная зона прамысловых тавараў, актуальных у канкрэтны перыяд, якая змяняецца некалькі разоў на год. Зараз, напрыклад, пара пікнікоў, садоў-агародаў, вось-вось пачнецца сезон адпачынку, таму і тавар прапануецца адпаведны: зямля для розных раслін, дровы і вугаль для вогнішча, валізкі для падарожжаў і іншыя неабходныя ў гэтую пару рэчы.
– MART INN (mart – рынак, inn – па дарозе) – гэта магазін каля дома, – кажа дырэктар дэпартамента маркетынгу і продажу, – у які можна па дарозе на нейкае мерапрыемства зайсці і купіць усё, што трэба, знайсці гэта лёгка і хутка, і жыць далей сваім жыццём, не надаючы вялікага значэння працэсу пакупкі. Увогуле, уся наша праца арганізавана так, каб пакупніку было зручна, выгадна і бяспечна рабіць пакупкі ў магазіне MART INN.
Разлічыцца за набытае таксама проста: у магазіне сем кас, на якіх адразу можна ўзважыць тавар, не адстойваючы чаргу спачатку да шаляў, прычым калі ў вас не больш за 3 пазіцыі тавару, вы можаце хутка і зручна разлічыцца на 1‑й экспрэс-касе. І, як адзначыла дырэктар магазіна Святлана Грабцэвіч, на беларускамоўнае пытанне касіры, і ўвогуле супрацоўнікі MART INN, здолеюць адказаць па-беларуску.
Астаецца толькі дадаць, што магазін працуе кожны дзень, без перапынкаў, з 8.00 да 23.00.
Святлана Трунеўская
