Клуб “Жывіца” ўжо добра вядомы нашым чытачам. Амаль штомесяц там ладзяцца розныя вечарыны, на якіх удзельнікі клуба дэманструюць свае таленты, віншуюць са святамі, весела бавяць час.
20 лістапада ў Рэчыцкім гарадскім палацы культуры адбылося яшчэ адно мерапрыемства, прысвечанае самай папулярнай беларускай гародніне – бульбе.
– Кожны ўдзельнік клуба прыгатаваў сваю страву, і кожная была прыгожа аздоблена і вельмі смачная, – расказала актыўная “жывічанка” Алена Карабанёва. – Журы прыйшлося нялёгка, калі патрэбна было вылучыць лепшую страву.
Але на свяце не толькі елі.
– Паэты чыталі свае вершы пра бульбачку, – распавяла Алена, – салісты групы “Здравіца і сям’я” выконвалі цудоўныя песні, Вольга Сафановіч і Саша Захарава дэфіліравалі ў беларускіх народных строях, якія пашыла Зоя Мікалаеўна Сафановіч. Варвара Сенюкова праспявала песню “О победной той весне” і павіншавала ўсіх з Днём вызвалення Рэчыцы, а нашыя дзяўчаты яскрава станчылі беларускія танцы.
На свяце былі і дзеці вайны, якія ўспаміналі, як яны галадалі падчас вайны, як елі гнілую бульбу, дзякуючы якой здолелі выжыць.
А напрыканцы свята яго ўдзельнікам надавалі тытулы. Званне “Бульбачыха-2016” атрымала Зінаіда Рыгораўна Антоненка. “Бульбашом-2016” ёй да пары быў прызначаны рыцар бегу Іван Аляксандравіч Мажэеў. Лепшай у конкурсе “Стравы нашых продкаў” стала Ірына Царанок, а ў конкурсе “Смаката” – Галіна Іванаўна Казак. “Майстрам бульбяных страў” была прызначана Зінаіда Сяргееўна Іванова, а “Майстрам бульбяных спраў” – Людміла Іваннікава. Лепшымі паэтамі-бульбянікамі сталі Галіна Левіна, Алена Карабанёва і Ніна Шупікава.
Приходите в «Живицу», друзья,
С нами петь, танцевать, веселиться!
Вы поймете, что это не зря,
Что не зря существует «Живица»! –
гэтымі радкамі Алена Карабанёва заклікае ўсіх рэчычан далучацца да дзейнасці клуба “Жывіца”.
Святлана Палонская
