З 1 сакавіка тэлеканал «Беларусь 3» пачынае выходзіць у новым афармленні. За аснову для распрацоўкі музычнай і графічнай «упакоўкі» канала быў узяты слоган «Беларусь 3» — тэлеканал сапраўдных каштоўнасцей!».
З улікам гэтага падбіралася графіка, музыка і ілюстрацыі. Істотныя змяненні адбыліся і ў дзіцячай праграме «Дабраранак», якая таксама выйдзе ў эфір у абноўленым варыянце.
У якасці музычнага афармлення быў абраны твор чэшскага кампазітара Яна Ладзіслава Дусека Piano Concerto in F Major op.17. Цікава, што гэтую кампазіцыю Ян Ладзіслаў, які працаваў па ўсёй Еўропе, стварыў менавіта на тэрыторыі нашай краіны.
Варта адзначыць, што для стварэння музычных заставак выкарыстаны выключна жывы гук. Запіс праходзіў у студыі гуказапісу Дома радыё Белтэлерадыёкампаніі пры ўдзеле аркестра маладых музыкаў Young Kamerata. За працэс падрыхтоўкі запісу, стварэння аркестроўкі і дырыжыраванне адказваў музыка і кампазітар Мікіта Найдзёнаў.
Абнаўленне ілюстрацыйнага рада адбылося пад кіраўніцтвам дызайнера тэлеканала Кацярыны Вусік. Так, у якасці ілюстрацый выкарыстаны рэпрадукцыі карцін вядомых выхадцаў з Беларусі — Марка Шагала і Івана Хруцкага, фотаздымкі з праекта Аляксандра Аляксеева і Алега Лукашэвіча «Скарбы Беларусі», гравюры з Бібліі Францыска Скарыны, амвон з Гродзенскага касцёла і іншыя творы, якія ўвасабляюць знакавыя мясціны нашай краіны.
Яркім прыкладам, дзе значныя змяненні адбыліся не толькі ў афармленні, стала дзіцячая праграма «Дабраранак».
З першага дня вясны галоўныя героі Кася і Лесік апынуцца ў новай студыі. Усімі любімыя зайцы будуць пачынаць кожны дзень з маленькага свавольства: раскідваць па ўсёй прасторы рознакаляровыя, чарадзейныя шары. Яркі і вясёлы пачатак праграмы дапаможа маленькім гледачам заўседы прачынацца ў добрым настроі.
А дапамагаць Касі і Лесіку будуць 4 новыя вядучыя — маленькія хлопчыкі і дзяўчынкі, якія прайшлі сур’ёзны кастынг на гэтую адказную ролю.
Знаёмцеся: Аня Дзядзюля, вучаніца 4 «Б» класа СШ № 71 г. Мінска, дзяўчынка-весялушка, якая піша вершы і смешныя гісторыі і ўжо з’яўляецца пераможцай конкурсаў дэкламатараў. Аня вельмі любіць жывел, таму разам з ёй жывуць дзве кошкі і кот.
Супрацьлегласць Ані — Варвара Саскавец, якая вучыцца ў 4 «А» класе сталічнай СШ № 167, — асоба сур’ёзная, начытаная, а яшчэ выдатніца, якая добра валодае англійскай мовай і вывучае польскую.
Што тычыцца хлопчыкаў, то Іллю Чудука, вучня 4 «Б» класа мінскай гімназіі № 56 клічуць хлопчыкам-рухам. Ён захапляецца футболам, мае ўнікальную памяць, добра іграе на гітары і барабанах, а таксама любіць фантастычныя апавяданні.
Яшчэ адзін маленькі вядучы «Дабраранка» — Іван Касцюкевіч. Хлопчык навучаецца ў 6 «Б» класе гімназіі № 3 г. Мінска. Іван — натура творчая, іграе на гітары і кларнеце, займаецца спартыўным арыентаваннем, а таксама з’яўляецца рэжысёрам школьнага тэатра.
Дарэчы, у кастынгу маленькіх вядучых для «Дабраранка» прынялі ўдзел звыш 75 чалавек з розных куткоў краіны. Асноўнымі крытэрыямі адбору былі арганічнасць, харызматычнасць і веданне беларускай мовы.
Аўтары праграмы абяцаюць, што новыя выпускі «Дабраранка», як і раней, будуць зараджаць маленькіх тэлегледачоў пазітывам і добрым настроем на ўвесь дзень.
Источник: Пресс-служба Белтелерадиокомпании
Share the post ««Беларусь 3» сустракае вясну з новым графічным афармленнем і новымі вядучымі»
